კატო ტაბატაძე - რთველი გერმანიაში

T: რომელ მეღვინეობაში ჩაატარე რთველი და რა იყო შენი ძირითადი როლი?

რთველი ჩავატარე გერმანიაში, ბადენში მდებარე Weingut Keifer & Schmidt-ში. ჩემი ძირითადი მოვალეობები მარანში საქმიანობა იყო, ფერმენტაციის კონტროლი, რეზერვუარების რეცხვა, სისუფთავის დაცვა, საფუვრის დამატება და ა.შ.

T: როგორი იყო რთველი გერმანიაში?

რუტინის თვალსაზრისით საკმაოდ რთული, მაგრამ კარგად ორგანიზებული. მეღვინეობის სპონტანურობა გერმანულ მოწესრიგებულობასთან კარგად იყო შეხამებული.

T: რა გასწავლა ამ გამოცდილებამ, როგორც ენოლოგს?

პირველ რიგში, უფრო ნათელი წარმოდგენა შემიქმნა მარანში მუშაობის სპეციფიკაზე, მეტი ინფორმაცია მომცა ადგილობრივი, განსაკუთრებით კი PIWI - რეზისტენტული ჯიშების შესახებ. გავეცანი ახალ ტექნოლოგიას - მეღვინეობაში გამოყენებულ საფუვრის გამამრავლებელ რეაქტორს. რა თქმა უნდა, ყველაზე სასიამოვნო ნაწილი ბევრი ახალი ღვინის გასინჯვა იყო.

T: რა ცოდნას და პრაქტიკას გამოიყენებ მომავალში საქართველოში?

ვფიქრობ, გარკვეული დოზით ყველა ტიპის გამოცდილებას გამოვიყენებ. ამ პერიოდმა ძალიან გამზარდა ყველა მიმართულებით, ამიტომ, ჩემი აზრით, დამეხმარება როგორც დაგროვილი პროფესიული ცოდნის ინვესტირებაში, ასევე - მომავალი სამსახურებრივი ურთიერთობების ჩამოყალიბებაში.