FAO-ს მხარდაჭერით, თბილისში ჯული პატერსონის სამდღიანი ტრენინგი ღვინის ექსპორტზე გაიმართა
- tboba magazine
- Apr 10
- 1 min read
Updated: Apr 16
გაეროს სურსათისა და სოფლის მეურნეობის ორგანიზაციამ (FAO) საქართველოს ღვინის სექტორის წარმომადგენლებისთვის, ევროპისა და ჩრდილოეთ ამერიკის ბაზრებზე მათი პროდუქტის ექსპორტის შესაძლებლობების შესახებ, სამდღიანი ტრენინგი ჩაატარა. საგანმანათლებლო სესიებს ღვინის გაყიდვებსა და მარკეტინგში FAO-ს საერთაშორისო ექსპერტი და Marq Wine Group-ის მმართველი პარტნიორი ჯული პატერსონი გაუძღვა. ღონისძიება ევროკავშირისა და შვედეთის ENPARD IV პროგრამის ფარგლებში განხორციელდა.
ტრენინგის მიზანს საქართველოს ღვინის სექტორისთვის ბაზრის დივერსიფიკაციის შესაძლებლობების მხარდაჭერა წარმოადგენდა, განსაკუთრებით ამერიკის შეერთებულ შტატებში, კანადაში, გერმანიაში, დანიაში, ფინეთში, ნორვეგიასა და შვედეთში.
სამდღიანი ინტერაქტიული ტრენინგი მოიცავდა ისეთ საკითხებს, როგორებიცაა: ბაზრის სტრუქტურის სიღრმისეული მიმოხილვა, ფასწარმოება და პროდუქტის განთავსება, ბრენდინგი და ბიზნესის სამიზნე რეგიონებში განვითარების სტრატეგიები.
ღონისძიებას, ღვინის სექტორის 130-ზე მეტი წარმომადგენელი დაესწრო. ტრენინგის მონაწილეებმა მიიღეს ცოდნა, რომელიც უმნიშვნელოვანესია მათთვის საინტერესო ღვინის ბაზრებზე ექსპორტის მეშვეობით ბიზნესის განვითარებისთვის.
“ევროპულ და ჩრდილოეთ ამერიკის ბაზრებზე ღვინის ექსპორტისთვის რელევანტური მოთხოვნების შესახებ ინფორმაციის გაზიარება ძალიან მნიშვნელოვანია კომერციული სტრატეგიის განვითარებისთვის და სექტორის მდგრადი ზრდისთვის”, - ამბობს დენის რეისი, საქართველოში ევროკავშირის წარმომადგენლობის მდგრადი სასურსათო სისტემების პროგრამის მენეჯერი.
Comments